Институтот за комуникациски студии (ИКС) го објавува своето последно истражување „Медиумската писменост во студиските програми на универзитетите во РСМ“ како обид за мапирање на вклученоста и третманот на медиумската писменост во високото образование во земјава. Тргнувајќи од неопходноста за континуирано унапредување на вештините за непречена употреба и справување со дигиталното опкружување, ова истражување го отсликува ангажманот, волјата на универзитетите и факултетите во земјава за поставеноста на медиумската писменост како еден од своите приоритети. Преку деск-истражување и интервјуа со професори, даден е преглед на студиските програми на сите јавни, јавно-приватни универзитети и на делумно приватните високообразовни институции, ставени во корелација со очекуваните компетенции, вештини и знаења за медиумската, информациската и дигиталната писменост.

Еден од главните заклучоци укажува дека високообразовните институции, кои досега спорадично ја „вклучуваа“ медиумската писменост во различни, сродни предмети, веќе од оваа – 2021/2022, но и во текот на следните академски години ја имплементираат како посебен предмет на студиските програми. Настојувањата се медиумската писменост да добие свое место, пред сè, на катедрите за општествени и хуманистички науки, а особено на педагошките факултети. Истражувањето го опипува и пулсот на студентите, нивните искуства, ставови и потреби низ прашањето дали високото образование доволно ги оспособува да бидат во тек со последните текови во дигиталното општество. Посебен фокус се и студентите со попречености, кои го споделуваат своето искуство за првата компонента од медиумската писменост – пристапот до информации и медиуми, овој пат низ призмата на инфраструктурните и развојни можности на високообразовните институции.

Истражувањето на ИКС е дел од петгодишниот проект на УСАИД за медиумска писменост „Младите размислуваат“, што го спроведува ИРЕКС заедно со Македонскиот институт за медиуми и со Младинскиот образовен форум.