Генеративната вештачка интелигенција ќе има револуционерно влијание во обликувањето на следната генерација на новинарство, па 18 новинари од Македонија го истражуваа нејзиниот потенцијал за обработка на информации и создавање содржина, на обуката што овој месец ја организираше Институтот за комуникациски студии.

Учесниците темелно се запознаа со основните концепти, корисноста и функциите на алатката Chat GPT-4 за генерирање и трансформирање на текстови, слики и видеа. Преку практични вежби, тие директно ги испитуваа можностите на оваа алатка да создава сеопфатна и релевантна содржина, при што осознаа различни пристапи и техники што можат да ги користат за новинарски цели. Новинарите креираа и привлечна визуелна содржина што може да ги надополнува текстуалните наративи.

Преку демонстрации и примери, учесниците се запознаа со најновите достигнувања во создавањето мултимедијални содржини со помош на вештачка интелигенција и за огромниот потенцијал за иновации во дигиталното новинарство. Обуката ја подвлече важноста од континуирано учење и прилагодување на технолошката средина, којашто пак постојано се развива и ја наметнува потребата од покреативна и поразновидна новинарска пракса.

Обуката за користење на вештачката интелигенција во новинарски редакции беше организирана во рамките на проектот „Користи факти“, што е поддржан од Британската амбасада во Скопје.