Портфолио
Во својата работа ИКС ги поврзува истражувањето, образованието и комуникацијата за да одговори на конкретни општествени предизвици. Преку национални, регионални и европски проекти развиваме и применуваме нови истражувачки пристапи, образовни модели, комуникациски решенија и медиумски формати.
Работиме самостојно и во партнерства со универзитети, истражувачки центри, медиуми, јавни институции, граѓански и меѓународни организации. Преку проектите ја применуваме и развиваме нашата експертиза во областите на медиумската писменост, интегритетот на информациите, новинарството, стратегиските комуникации, писменоста за иднината и комуникацијата за наука и животна средина.
Избрани проекти
2026 – 2029
Британска амбасада
КОМПАС: Координиран механизам за заштита од стратешко влијание (COMPASS)
Проектот е насочен кон зајакнување на институционалната и општествената отпорност кон странското мешање и манипулирање со информации (СММИ) во Северна Македонија. Преку воспоставување национален механизам за координирана реакција, развој на процедури и протоколи за стратегиски и кризни комуникации, обуки и симулациски вежби, проектот ќе придонесе кон подобра подготвеност на институциите за препознавање и справување со малициозни информациски влијанија.
КОМПАС вклучува и поддршка на медиумите и новинарите преку зајакнување на капацитетите за кибер-заштита, подобра соработка со надлежните институции и развој на истражувачки и информативни содржини за дезинформациски кампањи.
2026 – 2029
Европска Унија, Еразмус+
Back to the Future: Унапредување на писменоста за иднината преку интерактивни масовни отворени онлајн курсеви во Западен Балкан
Проектот ја внесува писменоста за иднината во регионален образовен контекст преку соработка меѓу високообразовни институции од Западен Балкан и Хрватска. Се развиваат интерактивни онлајн курсеви и заеднички образовни ресурси што ја поврзуваат писменоста за иднината со медиумската и информациската писменост, дигиталната трансформација, климатскиот активизам, човековите права, комуникацијата и иднината на работата.
2025 – 2027
Европска Унија
Поттикнување промени во однесувањето на граѓаните за подобрување на практиките за управување со отпад во Преспанскиот регион
Проектот ја применува комуникацијата како дел од решавањето на конкретен еколошки предизвик во Преспанскиот регион. Преку кампањата „Преспа? Разбуди се за чиста средина“, истражувањето и работата со локалните заедници се поврзуваат со медиумски содржини, јавни активности и едукација за селекција, намалување и поодговорно постапување со отпадот.
2025 – 2026
Британска амбасада Скопје
Зајакнување на оперативната подготвеност на владата за одговор на СММИ во Северна Македонија
Проектот се фокусираше на тоа како институциите ги препознаваат, обработуваат и координираат случаите на странско мешање и манипулирање со информации. Анализата на постојните механизми и информациски текови послужи како основа за развој на предлог оперативен протокол и стандардизиран образец за одговор на инциденти, со појасен процес од откривање и верификација до проценка на ризикот и јавна комуникација.
2025 – 2026
Британска амбасада Скопје
Следење, откривање и разобличување на скриеното странско мешање и манипулирање со информации
Проектот ги поврза истражувањето на СММИ со работа со институции, новинари и различни групи граѓани. Истражувањата и студиите на случај отворија простор за поинформирана институционална дискусија, додека преку обуки и практични алатки новинарите и граѓаните ги зајакнуваа вештините за препознавање, проверка и критичко оценување на манипулативните информациски влијанија.
2021 – 2025
УСАИД
Младите размислуваат – YouThink
YouThink е еден од позначајните проекти на ИКС во областа на медиумската писменост и работата со млади. Преку истражувања, образовни активности и соработка со високообразовни институции и медиуми, медиумската писменост се поврзуваше со критичкото размислување, образованието и младинското учество. Проектот придонесе и кон развој на нови академски и образовни формати во рамките на ИКС.
2022 – 2025
Британска амбасада Скопје
Користи факти: Употреба на новинарство засновано на факти за подигање на свеста и спротивставување на дезинформациите во медиумскиот простор во Северна Македонија
Проектот ги поврза истражувањето на дезинформациите со новинарството засновано на факти, медиумската продукција, обуките и јавните кампањи. Истражувачките сознанија беа преточени во аналитички и новинарски содржини, образовни ресурси и активности за граѓани, новинари и организации, а преку платформите „Само прашај“, „Дома“, „Рес публика“ и „Медиум“ сложените теми беа приближени до пошироката јавност.
2020 – 2026
Европска Унија, Хоризонт 2020
Градски пристап кон забрзување на решенија засновани на природата преку Регенеративен урбан светилник на ЕУ – UPSURGE
UPSURGE беше европски истражувачки проект насочен кон развој и примена на решенија засновани на природата за справување со загадувањето, климатските ризици и предизвиците на урбаниот развој. Проектот поврза научно истражување, тестирање решенија во реални урбани средини и комуникација со различни јавности и ја прошири работата на ИКС во областа на комуникацијата за наука и животна средина.
2020 – 2024
Европска Унија, Еразмус+
Популаризирање на комуникацијата за животна средина преку онлајн учење и виртуелна мобилност
Проектот придонесе комуникацијата за животната средина да се развива како интердисциплинарно образовно и професионално поле во регионот. Преку него беа развиени шестмесечна специјализација, наставна програма, онлајн едукативни материјали, игра за учење и водич за комуникација за животна средина, а учесниците преку курсеви и хакатон работеа на конкретни комуникациски решенија за еколошки предизвици.
2016 – 2018
Европска Унија
Медиумска писменост во ера на наплив на информации: Коалиција за медиумска и информациска писменост – МАМИЛ
Проектот ја зајакна медиумската и информациската писменост преку поврзување на медиуми, граѓански организации, образовни институции и млади. Во рамките на проектот беа развивани заеднички активности, ресурси и практики за критичко разбирање на информациите и медиумските содржини, а проектот беше вброен меѓу десетте најдобри европски проекти за медиумска писменост.
Консултантски услуги
Покрај истражувачката, образовната и проектната работа, ИКС нуди и стручни услуги за институции, организации, медиуми и професионални тимови.
Нашите услуги опфаќаат развој на комуникациски стратегии и јавни кампањи, специјализирани обуки и образовни програми, организација и комуникациска поддршка на настани, како и развој на мултимедијални и дигитални содржини.
Секоја соработка ја започнуваме со разбирање на контекстот, потребите и публиките. Истражувачкото и стручното знаење го преточуваме во решенија приспособени на конкретните цели на организацијата, од анализа и концепт до реализација и евалуација.