Локална акција за подобри политики за заштита на животната средина (SHAPE)

Проектот ги поврза граѓанските организации, училиштата и младите во заедничко препознавање на локалните еколошки проблеми и застапување за поефикасна заштита на природата и јавниот интерес.

„Локална акција за подобри политики за заштита на животната средина“ (SHAPE) беше насочен кон поголемо вклучување на граѓанските организации, училиштата и младите во заштитата на животната средина и јавниот интерес на локално ниво.

Преку проектот, граѓанските организации и младите развиваа знаења и практични вештини за препознавање на еколошките проблеми во своите заедници, за застапување пред институциите и за активно учество во креирањето подобри локални политики.

Важен дел од проектот беше поврзувањето на граѓанските организации со средните училишта. На овој начин се создаде простор за соработка меѓу локалните чинители и за поголемо младинско учество во активности поврзани со почиста, поздрава и поодржлива животна средина.

Во јануари 2021 година, ИКС го објави истражувањето „Локални приоритети за заштита на животната средина во регионите со заштитени подрачја“, спроведено во партнерство со Македонското еколошко друштво. Истражувањето ги опфати регионите Демир Капија, Преспа, Струмица, Пелагонија, Тиквеш и Охрид и ги мапираше клучните локални приоритети и предизвици во заштитата на природата.

Проектот заврши со настан во јануари 2022 година, на кој учествуваа повеќе од 130 млади луѓе од земјата. Тие ги споделија своите ставови, идеи и препораки за заштита на природата, покажувајќи дека младите можат активно да придонесат кон поодговорни локални политики за животната средина.