28 евра – цената на Ибеј за загрозен европски вид

Проектот преку истражувачки документарен филм ја отвора темата за нелегалниот лов и трговијата со ретки и загрозени европски видови, како и за последиците врз биодиверзитетот.

Институтот за комуникациски студии доби грант за изработка на истражувачки документарен филм во областа на биодиверзитетот, со фокус на нелегалниот лов, трговијата и продажбата на ретки и загрозени европски видови.

Проектот „28 евра – цената на Ибеј за загрозен европски вид“ имаше за цел преку новинарско истражување и документарна продукција да ја отвори темата за исчезнувањето и занемарувањето на загрозените видови, како и за одговорноста на различни актери во овие процеси.

Филмот се работеше во соработка со Deutsche Welle, а снимањето се одвиваше на повеќе локации во Северна Македонија, Германија и други подрачја релевантни за темата. Преку теренско истражување, визуелно раскажување и новинарски пристап, проектот ја доближи до јавноста врската меѓу нелегалната трговија, слабата заштита на видовите и пошироките последици врз биодиверзитетот.

Проектот придонесе кон развој на новинарство за животната средина и кон поголема јавна свест за потребата од заштита на ретките и загрозени видови. Истовремено, тој ја нагласи важноста на истражувачкото новинарство во откривање и објаснување на сложени еколошки проблеми што често остануваат недоволно видливи во јавноста.