ИКС на конференција на ОБСЕ/ОДИХР во Варшава за улогата на граѓанското општество во изборните реформи
Институтот за комуникациски студии (ИКС) учествуваше на регионалниот настан „Зајакнување на улогата на граѓанските организации во спроведувањето на изборните препораки“, одржан на 9 и 10 ноември 2026 година во Варшава, во организација на Канцеларијата за демократски институции и човекови права на ОБСЕ (ОДИХР).
Настанот обедини претставници на граѓански организации од Западен Балкан и меѓународни партнери, кои разменија искуства за унапредување на изборните реформи и зајакнување на соработката со институциите и граѓаните.
Бојан Георгиевски, програмски менаџер и истражувач во ИКС, учествуваше како панелист на сесијата „Наоѓање сојузници: Вклучување на граѓаните и јавноста во реформскиот процес“. Дискусијата беше посветена на начините на кои граѓанските организации можат да градат партнерства со медиумите, граѓаните и другите чинители за поддршка на демократските реформи.
Георгиевски ги претстави искуствата на ИКС во следењето на штетните политички наративи преку иницијативата „ШТЕТ-НА“, истакнувајќи ја важноста истражувачките наоди да се преточат во разбирливи содржини што поттикнуваат јавна дебата и поодговорна политичка комуникација.
Воедно, тој ја претстави работата на ИКС во областа на справувањето со странското мешање и манипулирање со информации (СММИ) и ја нагласи вредноста на соработката на граѓанските организации со сите чинители во општеството со цел да ѝ се помогне на јавноста да ги препознае и разбере информациските манипулации.



