За ИКС
Истражувачки, образовен и комуникациски центар што работи во областа на комуникациите, медиумите, новинарството, односите со јавност, политичката комуникација и корпоративното комуницирање.
Кои сме ние
Знаење, истражување и практика на едно место.
Институтот за комуникациски студии (ИКС) е непрофитна научноистражувачка организација, основана во 2012 година, која работи во областа на комуникациите, медиумите, новинарството, односите со јавноста, политичката комуникација и корпоративното комуницирање.
ИКС спроведува научни и применети истражувања, развива образовни програми, реализира проекти и јавни кампањи и обезбедува консултантски услуги за организации, институции и професионални тимови. Во својата работа, Институтот ги поврзува академското знаење и истражувачките сознанија со нивната практична примена во комуникациите, медиумите и пошироките општествени процеси.
ИКС работи како истражувачки, образовен и комуникациски центар и соработува со академски институции, медиуми, граѓански организации, јавни институции и меѓународни партнери. Преку својата работа, Институтот придонесува кон подобро информирање, критичко размислување, професионална и одговорна комуникација и поактивно учество на граѓаните во општеството.
Статус и признанија
Формална основа на нашата работа.
Од 2017 година, Високата школа за новинарство и односи со јавноста и Институтот за комуникациски студии работат како една организација под името на Институтот.
Статус на научна установа од областа на општествените и хуманистичките науки
Акредитација за едногодишни и двегодишни магистерски студии по Менаџирање на стратегиски комуникации
Носител на Еразмус+ повелбата за високообразовни институции во Европа, со учество во меѓународни образовни и истражувачки партнерства
Од 2022 година, носител на УНЕСКО катедрата за писменост за иднината и медиумска писменост, преку која ја развива својата истражувачка и образовна работа во оваа област
Мисија
Да придонесеме кон демократско и информирано општество преку истражување, образование и соработка со медиумите, граѓанското општество и јавните институции, поттикнувајќи критичко размислување, транспарентност, отчетност и активно учество на граѓаните во јавниот живот.
Визија
Македонија како демократско општество со критичка и информирана јавност, професионални медиуми и отворени и одговорни институции.
На што работиме
Истражуваме и работиме на шест поврзани области.
Нашата работа е насочена кон повеќе поврзани области што ги следат промените во комуникацијата, медиумите и современото општество.
Писменост за иднината и медиумска писменост
Развиваме програми и ресурси за критичко разбирање на медиумите и информациите, дигитална безбедност и истражување на можните иднини. Работиме со ученици, наставници, студенти, професионалци и ранливи групи.
Медиуми и новинарство
Работиме на зајакнување на професионалното новинарство и медиумските стандарди, поттикнувајќи го информацискиот интегритет и содржините од јавен интерес преку истражувања, обуки, партнерства со медиуми и продукција на содржини.
Информациски нарушувања
Ги проучуваме информациските нарушувања и развиваме пристапи за нивно препознавање и разбирање, со цел поголема отпорност на јавноста и институциите кон дезинформации, пропаганда, странско информациско мешање и други форми на манипулативна комуникација.
Стратегиски комуникации
Ги унапредуваме практиките за јасна, одговорна и етичка комуникација преку развој на комуникациски стратегии, кампањи, кризна комуникација, односи со јавноста и јавен настап.
Политичка комуникација
Работиме на транспарентност, отчетност и поактивно учество на јавноста во јавните политики преку истражувања, дијалог и партнерства.
Комуникација за наука и животна средина
Ги приближуваме научните и еколошките теми до јавноста преку јасна и одговорна комуникација за животната средина, климатските промени, природните ресурси и одржливиот развој.
Нашиот пристап
Четири начини на кои работиме.
Истражуваме
Спроведуваме научни и применети истражувања во областа на комуникациите, медиумите, новинарството, медиумската писменост и јавниот интерес.
Образуваме
Развиваме образовни програми, обуки и ресурси за студенти, професионалци и организации во областите на медиумите, комуникациите, медиумската писменост и темите од јавен интерес.
Информираме
Креираме содржини, кампањи и јавни ресурси што обработуваат теми од јавен интерес и ги прават подостапни и поразбирливи за различни публики.
Застапуваме
Се залагаме за слобода на изразување, професионални медиуми, транспарентни институции, одговорна комуникација и политики засновани на факти.
Хронологија
Клучни моменти
2008
Основана е Високата школа за новинарство и односи со јавност.
2012
Основан е Институтот за комуникациски студии.
2017
Високата школа и ИКС се обединуваат во една организација и продолжуваат да работат под името Институт за комуникациски студии.
2022
Во рамки на ИКС е воспоставена УНЕСКО катедрата за писменост за иднината и медиумска писменост.