Инклузивно и креативно медиумско образование

Проектот се фокусира на развој на инклузивни и креативни модели за медиумска писменост, применливи во формалното и неформалното образование во Северна Македонија, Финска и Италија.

„Инклузивно и креативно медиумско образование“ е европски проект насочен кон подобрување на образованието за медиумска писменост преку развој на практични образовни модели што можат да се користат од училишта, факултети, граѓански организации и други чинители во формалното и неформалното образование.

Во рамки на проектот се развиваат три модели за медиумска писменост, подготвени од партнерските организации од Северна Македонија, Финска и Италија. Секој модел се тестира во локален контекст, а потоа се адаптира за примена во земјите на проектните партнери.

Моделите се фокусираат на наставни принципи за дизајнирање инклузивни иницијативи за медиумска писменост, образовни стратегии што ја поттикнуваат креативноста преку критичка медиумска писменост и поттикнување на граѓанскиот ангажман на младите преку медиумска писменост.

Во рамки на проектот, ИКС го развива и тестира моделот за поттикнување граѓанска вклученост кај младите преку медиумска писменост. Целта е медиумската писменост да се користи како алатка за критичко размислување, активно учество, културна различност и поодговорно користење на медиумите.

Проектот придонесува кон создавање трајни едукативни ресурси што можат да им помогнат на наставниците, младите, образовните институции и граѓанските организации да развиваат поинклузивни, покреативни и поприменливи пристапи во медиумското образование.