Градски пристап кон забрзување на решенија засновани на природата преку Регенеративен урбан светилник на ЕУ — UPSURGE

Проектот UPSURGE е насочен кон развој, тестирање и промоција на решенија засновани на природата за ублажување на ефектите од климатските промени и загадувањето во европските градови.

Институтот за комуникациски студии е партнер во проектот „Градски пристап кон забрзување на решенија засновани на природата преку Регенеративен урбан светилник на ЕУ“ — UPSURGE, чија цел е да претстави и поддржи решенија за ублажување на ефектите од климатските промени, засновани на природата.

Проектот развива Регенеративен урбан светилник како референтна европска мрежа заснована на знаења, практики и тестирања на решенија засновани на природата во реални урбани услови. Во мрежата се вклучени европски градови, истражувачки институции, компании и граѓански организации кои работат на применливи модели за поодржливи и поотпорни градови.

Мерките во рамки на проектот се насочени кон справување со загадувањето, климатските ризици и предизвиците поврзани со урбаниот развој. Тие опфаќаат комбинација од дигитални системи, паметни технологии, ресурси, алатки и одржливи модели што им помагаат на градовите да ги применуваат решенијата засновани на природата во секојдневното планирање и управување.

Конзорциумот е составен од 22 научно-истражувачки институции, граѓански организации, компании и градови од Европа. Дел од градовите вклучени во проектот се Белфаст, Бреда, Будимпешта, Марибор, Катовице, Патрас и Прато, а целта е мрежата да се прошири и со други европски градови.