Инспекцискиот совет ќе го менува правилникот за подготовка на извештаите на инспекциските служби заради унапредување на квалитативните информации. Измените се засноваат на проценката за транспарентноста и отчетноста на инспекторатите со надлежности во животната средина, која беше спроведена од Центарот за еколошка демократија ФЛОРОЗОН и Институтот за комуникациски студии во рамките на кампањата „Разбистри сè“.

За таа цел, Инспекцискиот совет организираше две работилници за вработените во инспекциските служби и инспекторатите одговорни за подготовка на полугодишните извештаи. Со вклучување на претставници од инспекциските служби треба да се обезбеди инклузивност и консезуалност во усвојувањето на предложените измени на Правилникот за формата и содржината на извештајот за работа на инспекциската служба за претходните шест месеци и на годишниот извештај за работа на инспекциските служби.

Извештајот претставува основна алатка за транспарентност и отчетност на инспекциските служби кон корисниците на нивните услуги и треба да содржи доволно податоци од јавен карактер за да се оцени квалитетот на испорачаните услуги. Оттука, ЦЕД Флорозон и ИКС подготвија насоки за унапредување на квалитативниот дел на извештаите, а со измените во правилникот треба да се унифицира пристапот во генерирањето и анализата на податоците за работата на инспекциските служби.

Фасилитатори на работилниците беа Методија Димовски, член на Инспекцискиот совет од областа на животната средина и заштита на здравјето на луѓето, и Кирил Ристовски од ЦЕД ФЛОРОЗОН.

Кампањата „Разбистри сè“ се спроведува од Институтот за комуникациски студии и е поддржана од Британската амбасада во Скопје.