Институтот за комуникациски студии (ИКС) е дел од европскиот академски проект Teacher Academy for Media Literacy in Europe (TAMeLi) во програмата Еразмус+ наставнички академии, кој обединува 14 институции од девет европски земји со цел да се унапреди образованието за наставници во областа на медиумската и дигиталната писменост.

Координатор на проектот е Католичкиот Универзитет од Лувен, Белгија (KU Leuven) а во конзорциумот учествуваат универзитети, високообразовни институции, училишта, центри за обука, организации за медиумска писменост и партнери со искуство во образованието, новинарството и дигиталното учење.

Проектот официјално започна во април 2026 година, а на почетниот состанок што се одржа во мај во Брисел, конзорциумот ги усогласи заедничката визија, работните задачи и следните чекори за развој на проектот.

Проектот има цел да им помогне на сегашните и идните наставници да стекнат знаења, вештини и практични алатки за работа со деца и млади во современата дигитална и медиумска средина. Во следните три години, партнерите ќе работат на анализа на постојните модели и истражувања, развој на иновативни пристапи за образование и обука на наставници, како и тестирање и споделување ресурси што ќе можат да се користат во наставата и во професионалниот развој на наставниците.

ИКС во проектот учествува како партнер со искуство во медиумската писменост, истражувањата, развојот на образовни ресурси и работата со наставници, млади, медиуми и институции. Учеството во TAMeLi е можност искуствата од Северна Македонија да бидат дел од поширока европска размена на знаење и практики за медиумска писменост во образованието.

Конзорциумот го сочинуваат KU Leuven, Prizma, d-teach online school, Dublin City University, CENJOR – Centro Protocolar de Formação Profissional para Jornalistas, Pädagogische Hochschule Heidelberg, Heidelberg University, Heidelberg School of Education, University of Cologne, Università degli Studi di Firenze, Institute of Communication Studies, University of the Aegean, University of Tartu и Tartu Catholic Education Center.

Повеќе информации за проектот се достапни на веб-страницата на TAMeLi.