Дискусија за можни модели за институционален одговор на СММИ

Институтот за комуникациски студии (ИКС) го одржа третиот состанок на меѓуресорската координативна група за справување со странско мешање и манипулирање со информации на којашто се претставија неколкуте модели на институционален одговор што веќе се применуваат во земјите од Европската Унија, Обединетото Кралство и други држави. Фокусот беше ставен на можностите овие практики да се прилагодат на националниот контекст. Учесниците дискутираа за улогата на институциите и потребата од подобра координација во одговорот на современите хибридни закани и надворешни малициозни влијанија.

На работната група ѝ беа презентирани и наодите од појдовната проценка, кои даваат увид во тековната состојба, силните и слабите страни во справувањето со манипулацијата со информации. Овие наоди треба да послужат како основа за креирање на идни политики и протоколи за синхронизиран институционален одговор.

Беше најавено дека појдовната проценка ќе биде дополнително презентирана и дискутирана на тркалезна маса што ќе се одржи на почетокот на април, каде се очекува поширока вклученост на релевантни институции и експерти. Целта е да се поттикне сеопфатен и координиран институционален одговор.

Состанокот е дел од пошироките активности насочени кон утврдување поефикасни политики и практики за справување со странското влијание и зајакнување на демократската стабилност.